لاہور( سپورٹس ڈیسک)یوئیفا کے صدر الیگزینڈر چیفرن نے فیفا کے ساتھ بڑھتے ہوئے اختلافات کے باعث ورلڈ کپ 2026 کے فائنل میں شرکت نہیں کی۔خبر رساں ادارے کے مطابق معاملے سے آگاہ ذرائع کا کہنا ہے کہ دونوں عالمی فٹبال اداروں کے درمیان ٹورنامنٹ کے دوران ڈسپلنری فیصلوں، ریفری انتظامات اور میچز کے انعقاد سے متعلق متعدد معاملات پر اختلافات پیدا ہوئے۔ذرائع کے مطابق سب سے بڑا تنازع اس وقت سامنے آیا جب فیفا نے امریکی فارورڈ فولارین بالاگون کے ریڈ کارڈ کے بعد ایک میچ کی خودکار پابندی کو مؤخر کرنے کا فیصلہ کیا۔ یوئیفا نے اس اقدام پر سخت ردعمل دیتے ہوئے مؤقف اختیار کیا کہ فیفا نے اپنے اختیارات کی حدود سے تجاوز کیا ہے۔چیفرن کے فائنل میں شریک نہ ہونے کی ایک اور وجہ صومالی ریفری عمر عبدالقادر آرتان کا معاملہ بھی بتایا جا رہا ہے، جنہیں امریکا میں داخلے کی اجازت نہ ملنے کے باعث ورلڈ کپ میں فرائض انجام دینے کا موقع نہیں ملا۔ بعد ازاں انہیں اگست میں ہونے والے یوئیفا سپر کپ کے لیے ریفری مقرر کیا گیا۔رپورٹ کے مطابق یورپی فٹبال حکام نے ایران سے متعلق میچوں کے انتظامی معاملات، لازمی پانی کے وقفوں اور فائنل میں ہاف ٹائم کے دورانیے میں اضافے سمیت فیفا کے بعض نئے فیصلوں پر بھی تحفظات کا اظہار کیا۔واضح رہے کہ ورلڈ کپ 2026 کے فائنل میں اسپین نے اضافی وقت میں ارجنٹائن کو 1-0 سے شکست دے کر عالمی چیمپئن بننے کا اعزاز حاصل کیا۔
