کراچی( کامرس ڈیسک) کاٹن ایسوسی ایشن کی جانب سے چھ ماہ کی معطلی کے بعد کاٹن اسپاٹ ریٹس کے دوبارہ اجرا نے کاٹن کی پوری سپلائی چین میں اطمینان کی فضا پیدا کر دی ہے۔رپورٹس کے مطابق کراچی کاٹن ایسوسی ایشن نے بارہ دسمبر دو ہزار پچیس کے بعد پہلی مرتبہ چھ جون دو ہزار چھبیس کو کاٹن ایئر دو ہزار پچیس تا چھبیس کا آخری اسپاٹ ریٹ اکیس ہزار روپے جاری کیا۔ اس کے ساتھ ہی کاٹن ایئر دو ہزار چھبیس تا ستائیس کا پہلا اسپاٹ ریٹ آٹھ جون کو جاری کیے جانے کا امکان ظاہر کیا جا رہا ہے۔مارکیٹ ذرائع کے مطابق پنجاب میں کپاس کی کاشت توقعات سے کم رہی ہے جس کے باعث روئی اور پھٹی کی قیمتوں میں گزشتہ ہفتے نمایاں اضافہ دیکھنے میں آیا ہے۔ماہرین کے مطابق اسپاٹ ریٹس کی بحالی سے مارکیٹ میں شفافیت اور اعتماد میں اضافہ ہوگا، تاہم کپاس کی پیداوار میں کمی قیمتوں پر آئندہ دنوں میں مزید اثر انداز ہو سکتی ہے۔
