اسلام آباد ( کامرس ڈیسک) ملک بھر کے بجلی صارفین کے لیے ایک بار پھر قیمتوں میں اضافہ کر دیا گیا ہے جس کا باقاعدہ نوٹیفکیشن جاری کر دیا گیا۔نیشنل الیکٹرک پاور ریگولیٹری اتھارٹی کی جانب سے جاری اعلامیے کے مطابق فی یونٹ بجلی ایک روپے بیالیس پیسے مہنگی کی گئی ہے۔حکام کے مطابق یہ اضافہ فروری دو ہزار چھبیس کی ماہانہ ایڈجسٹمنٹ کے تحت کیا گیا ہے اور اس کا اطلاق اپریل کے بجلی کے بلوں میں ہوگا۔اعلامیے میں کہا گیا ہے کہ اس فیصلے کا اطلاق ملک بھر سمیت کراچی کے صارفین پر بھی ہوگا، تاہم لائف لائن صارفین اور برقی گاڑیوں کے چارجنگ اسٹیشنز کو اس سے مستثنا قرار دیا گیا ہے۔یاد رہے کہ اس سے قبل جنوری کی ایڈجسٹمنٹ میں بھی فی یونٹ ایک روپے تریسٹھ پیسے اضافہ کیا گیا تھا، جس کے باعث بجلی کی قیمتوں میں مسلسل اضافے کا رجحان برقرار ہے۔
