اسلام آباد( کامرس ڈیسک) آئندہ مالی سال 2026-27 کے لیے وفاقی بجٹ کا حجم تقریباً 17 ہزار 500 ارب روپے تک ہونے کا امکان ظاہر کیا گیا ہے۔وزارت خزانہ کے ذرائع کے مطابق آئی ایم ایف کے ساتھ بجٹ سے متعلق مذاکرات مکمل ہو چکے ہیں اور اہم مالی اہداف پر اتفاق بھی طے پا گیا ہے، تاہم تنخواہ دار طبقے کو ریلیف دینے سے متعلق امور پر مزید مشاورت جاری ہے۔ذرائع کا کہنا ہے کہ آئندہ بجٹ میں تقریباً 220 ارب روپے کے نئے ٹیکس عائد کیے جانے کی تجویز ہے، جبکہ تنخواہ دار طبقے کے لیے انکم ٹیکس سلیبز میں بھی ردوبدل کیا جائے گا۔اطلاعات کے مطابق آخری ٹیکس سلیب کی حد میں اضافہ بھی متوقع ہے تاکہ مخصوص آمدنی والے افراد پر بوجھ کم کیا جا سکے۔ایف بی آر ذرائع کے مطابق تاجروں کے لیے فکسڈ ٹیکس اسکیم، جبکہ ہائبرڈ اور الیکٹرک گاڑیوں پر سیلز ٹیکس میں اضافے کی تجاویز بھی حتمی مراحل میں ہیں۔حکام کا کہنا ہے کہ ٹیکس وصولیوں کا ہدف حاصل کرنے کے لیے بجٹ میں آمدن بڑھانے کے مختلف اقدامات شامل کیے جا رہے ہیں۔
