اسلام آباد(پاکستان خبر) سندھ کے سینئر وزیر شرجیل انعام میمن اور وفاقی وزیر داخلہ محسن نقوی کے درمیان اہم ملاقات ہوئی، جس میں امن و امان، بین الصوبائی تعاون، منشیات کے خاتمے اور عوامی خدمات کی بہتری سمیت مختلف اہم امور پر تفصیلی تبادلہ خیال کیا گیا۔ملاقات کے دوران کراچی سمیت سندھ کے بڑے شہروں میں منشیات کی روک تھام اور امن و امان کی مجموعی صورتحال کا جائزہ لیا گیا۔ وفاقی وزیر داخلہ محسن نقوی نے سندھ حکومت کو کچے کے علاقوں میں ڈاکوؤں اور جرائم پیشہ عناصر کے خلاف کامیاب کارروائیوں پر مبارکباد بھی دی۔اس موقع پر شرجیل انعام میمن نے کہا کہ وفاق اور صوبوں کے درمیان مؤثر رابطہ اور باہمی تعاون قومی چیلنجز سے نمٹنے کے لیے ناگزیر ہے۔ انہوں نے زور دیا کہ قومی مفاد کے معاملات میں تمام اداروں اور حکومتوں کو مشترکہ طور پر کردار ادا کرنا چاہیے۔انہوں نے مزید کہا کہ سندھ حکومت جرائم کے خاتمے، امن و امان کے قیام اور شہریوں کے تحفظ کے لیے اپنی کوششوں میں مزید تیزی لائے گی۔وفاقی وزیر داخلہ محسن نقوی نے اس موقع پر یقین دہانی کرائی کہ امن و امان کے قیام اور منشیات کی روک تھام کے لیے وفاقی حکومت ہر ممکن تعاون فراہم کرے گی۔انہوں نے سندھ پولیس کی کارکردگی کو سراہتے ہوئے کہا کہ فورس نے مشکل حالات میں بہادری، پیشہ ورانہ مہارت اور عزم کا مظاہرہ کرتے ہوئے امن و امان کی بحالی میں قابلِ قدر کردار ادا کیا ہے۔ملاقات میں دونوں رہنماؤں نے اس عزم کا اظہار کیا کہ وفاق اور سندھ حکومت کے درمیان رابطوں اور تعاون کو مزید مضبوط بنا کر عوامی مسائل کے حل اور بہتر طرزِ حکمرانی کو یقینی بنایا جائے گا۔
