نیویارک( ویب ڈیسک) امریکا میں الیکٹرک ایئر ٹیکسی کے مستقبل کی جانب اہم پیش رفت کرتے ہوئے پہلے آزمائشی آپریشن کا کامیاب آغاز کر دیا گیا، جس کے دوران مریضوں کے لیے عطیہ کیے گئے انسانی اعضا ایک ریاست سے دوسری ریاست منتقل کیے گئے۔یہ آزمائشی پروازیں امریکی فیڈرل ایوی ایشن ایڈمنسٹریشن (ایف اے اے) اور محکمہ ٹرانسپورٹ کے مشترکہ پائلٹ پروگرام کے تحت انجام دی گئیں، جس کا مقصد جدید فضائی نقل و حمل کے نظام کو عملی شکل دینا ہے۔رپورٹس کے مطابق الیکٹرک ورٹیکل ٹیک آف اینڈ لینڈنگ (ای وی ٹول) طیاروں کے انٹیگریشن پائلٹ پروگرام کے تحت ہونے والی یہ پہلی عملی پروازیں کامیابی سے مکمل کی گئی ہیں۔یہ کثیر سالہ منصوبہ الیکٹرک ایئر ٹیکسیوں کی عملی کارکردگی، حفاظتی معیار اور آپریشنل صلاحیت کا جائزہ لینے کے لیے شروع کیا گیا ہے تاکہ مستقبل میں انہیں شہری فضائی ٹرانسپورٹ کے باقاعدہ نظام کا حصہ بنایا جا سکے۔ماہرین کا کہنا ہے کہ اس پیش رفت سے نہ صرف ہنگامی طبی خدمات کو مزید مؤثر بنانے میں مدد ملے گی بلکہ مستقبل میں شہری آمدورفت کے جدید، تیز رفتار اور ماحول دوست ذرائع کی راہ بھی ہموار ہوگی۔
