گلگت بلتستان: چار حلقوں میں انتخابی نتائج روک دیے گئے، دوبارہ پولنگ کا حکم

گلگت(پاکستان خبر)گلگت بلتستان میں الیکشن کمیشن نے چار حلقوں کے انتخابی نتائج روک کر متعدد پولنگ اسٹیشنز پر دوبارہ پولنگ کرانے کا فیصلہ کیا ہے۔الیکشن کمیشن کے مطابق حلقہ جی بی اے آٹھ سکردو کے دس پولنگ اسٹیشنز کے نتائج کالعدم قرار دیتے ہوئے پندرہ جون کو دوبارہ پولنگ کرانے کا نوٹیفکیشن جاری کیا گیا ہے۔ذرائع کے مطابق پاکستان پیپلز پارٹی کے امیدوار سید محمد علی شاہ کی جانب سے بعض پولنگ اسٹیشنز میں انتخابی بے ضابطگیوں اور بدانتظامی کے الزامات عائد کیے گئے تھے، جن کی درخواست پر یہ فیصلہ سنایا گیا۔مزید بتایا گیا ہے کہ جی بی پندرہ دیامر ون، جی بی سولہ دیامر ٹو اور جی بی سترہ دیامر تھری کے نتائج بھی فی الحال روک دیے گئے ہیں۔الیکشن کمیشن نے ہدایت کی ہے کہ دوبارہ پولنگ مکمل ہونے تک کسی بھی حلقے کا حتمی نتیجہ جاری نہ کیا جائے، جبکہ پوسٹل بیلٹس کی گنتی اور حتمی نتائج کے اجرا پر بھی پابندی عائد کر دی گئی ہے۔چیف الیکشن کمشنر گلگت بلتستان کے مطابق تمام نتائج دوبارہ پولنگ کے بعد شامل کیے جائیں گے، جس کے بعد ہی حتمی نتیجے کا اعلان کیا جائے گا۔