پشاور( پاکستان خبر)خیبر پختونخوا کی پروونشل ڈیزاسٹر مینجمنٹ اتھارٹی نے صوبے کے بالائی اضلاع میں گلیشیئر جھیل پھٹنے کے خدشے کے پیش نظر الرٹ جاری کر دیا ہے۔پی ڈی ایم اے کے مطابق 19 سے 25 جولائی تک بالائی علاقوں میں شدید بارشوں، اچانک سیلاب اور ممکنہ طغیانی کا خطرہ ہے۔ادارے نے اپر و لوئر چترال، اپر دیر، سوات، بحرین، اپر و لوئر کوہستان اور مانسہرہ کی ضلعی انتظامیہ کو ہائی الرٹ رہنے کی ہدایت کی ہے۔پی ڈی ایم اے کا کہنا ہے کہ بارشوں کے باعث گلیشیئر تیزی سے پگھل سکتے ہیں، جس سے دریاؤں میں پانی کی سطح بلند ہونے کا امکان ہے۔ ریسکیو اداروں کو ہنگامی مشینری، عملہ اور امدادی سامان مکمل طور پر تیار رکھنے کی ہدایات بھی جاری کر دی گئی ہیں۔
