اسلام آباد( پاکستان خبر)وفاقی وزیر اطلاعات عطا تارڑ نے کہا ہے کہ آنے والے دنوں میں عالمی منڈی میں تیل کی قیمتیں مزید بڑھ سکتی ہیں، اور ہمیں سب کو مل کر توانائی کی بچت کے حوالے سے آئندہ کا لائحہ عمل تیار کرنا ہوگا۔وفاقی وزیر اطلاعات عطا تارڑ اور وفاقی وزیر پٹرولیم علی پرویز ملک نے مشترکہ پریس کانفرنس میں بتایا کہ خطے میں جاری کشیدگی کے پیش نظر وزیراعظم نے اپنی ٹیم میں کفایت شعاری کے اقدامات کیے اور مراعات میں کٹوتیاں کی گئی ہیں۔علی پرویز ملک نے کہا کہ کفایت شعاری کی وجہ سے اس ہفتے پیٹرول اور ڈیزل کی قیمتوں میں اضافہ روکا گیا، اور عید کی خوشیوں کو مدنظر رکھتے ہوئے قیمتیں برقرار رکھی گئیں۔ انہوں نے عوام اور حکومت سے اپیل کی کہ توانائی کی بچت میں بھرپور کردار ادا کیا جائے۔عطا تارڑ نے مزید کہا کہ عالمی منڈی کے حساب سے پیٹرولیم مصنوعات کی قیمتوں کا تعین ہوتا ہے، اس ہفتے پیٹرول کی قیمت میں 150 اور ڈیزل کی قیمت میں 250 روپے اضافے کو روکا گیا، تاہم آنے والے دنوں میں قیمتیں مزید اوپر جا سکتی ہیں، اور اس لیے سب کو مل کر بچت کے حوالے سے منصوبہ بندی کرنا ہوگی۔
