اسلام آباد( ویب ڈیسک) حکومت نے پاکستان ٹیلی کمیونیکیشن تنظیم نو ترمیمی بل 2026 سینیٹ سے واپس لے لیا۔ بل واپس لینے کی تحریک وزیر مملکت طلال چوہدری نے سینیٹ اجلاس میں پیش کی۔وفاقی وزیر آئی ٹی و ٹیلی کمیونیکیشن شزا فاطمہ خواجہ کے مطابق پی ٹی آر اے بل کی 90 روزہ قانونی مدت ختم ہونے کے قریب تھی، جس کے باعث حکومت نے بل واپس لینے کا فیصلہ کیا۔انہوں نے کہا کہ بل واپس نہ لیا جاتا تو معاملہ پارلیمنٹ کے مشترکہ اجلاس میں جاسکتا تھا، تاہم اس وقت مشترکہ اجلاس کے انعقاد کے حوالے سے کوئی حتمی فیصلہ نہیں تھا۔شزا فاطمہ خواجہ نے بتایا کہ حکومت تمام ضروری اور بنیادی نکات شامل کرکے جلد نیا اور جامع پی ٹی آر اے بل پیش کرے گی تاکہ قانونی عمل مؤثر اور بلا تاخیر مکمل کیا جاسکے۔
