حافظ نعیم الرحمان کا امریکا ایران معاہدے پر ردعمل، معائدہ ایران کی کامیابی قرار دیدیا

لاہور (پاکستان خبر) امیر جماعت اسلامی پاکستان حافظ نعیم الرحمان نے ایران اور امریکا کے درمیان طے پانے والے امن معاہدے پر ردعمل دیتے ہوئے اسے ایران کی کامیابی اور اسرائیل امریکا اتحاد کی ناکامی قرار دیا ہے۔سماجی رابطے کی ویب سائٹ ایکس پر جاری بیان میں انہوں نے کہا کہ ایران کی مزاحمت نے ثابت کیا ہے کہ سامراجی قوتیں اپنے مقاصد صرف اسی وقت حاصل کرتی ہیں جب ان کے سامنے مزاحمت نہ ہو، جبکہ استقامت اور ثابت قدمی سے کی گئی جدوجہد بالآخر کامیابی سے ہمکنار ہوتی ہے۔انہوں نے کہا کہ حالیہ پیش رفت کے بعد خطے میں نئے سفارتی اور دفاعی امکانات پیدا ہوئے ہیں جن سے فائدہ اٹھانا چاہیے۔حافظ نعیم الرحمان نے مطالبہ کیا کہ پاک سعودی دفاعی معاہدے کو مزید وسعت دی جائے اور اس میں ایران اور ترکیہ کو بھی شامل کیا جائے تاکہ خطے میں مشترکہ سلامتی اور استحکام کو فروغ مل سکے۔انہوں نے حکومت پاکستان پر زور دیا کہ پاک ایران گیس پائپ لائن منصوبے پر فوری طور پر عملی پیش رفت کی جائے اور اسے جلد مکمل کیا جائے۔امیر جماعت اسلامی نے ایران کے ساتھ آزادانہ تجارت شروع کرنے کا بھی مطالبہ کیا اور کہا کہ اقتصادی تعاون میں اضافہ خطے کے عوام کے مفاد میں ہوگا۔