بیروت(مانیٹرنگ ڈیسک) لبنان میں اسرائیلی فضائی حملے میں حزب اللہ کے سینئر کمانڈر یوسف ہاشم شہید ہو گئے۔ لبنانی وزارت صحت کے مطابق حملے میں سات افراد جاں بحق ہوئے جبکہ تین گاڑیاں تین میزائلوں سے نشانہ بنائی گئیں جس سے زوردار دھماکہ ہوا۔یوسف اسماعیل ہاشم حزب اللہ میں ایک تجربہ کار کمانڈر تھے اور خصوصی کمیٹیوں کے رکن بھی تھے۔ انہیں 2024 میں علی کرکی کے اسرائیلی حملے کے بعد اہم عہدے پر فائز کیا گیا تھا۔لبنانی سکیورٹی ذرائع کے مطابق ہاشم عراق میں حزب اللہ کے عسکری امور کے انچارج بھی رہ چکے تھے اور حملے کے وقت ایک خیمے میں میٹنگ میں موجود تھے۔حزب اللہ نے بتایا کہ حملے میں یوسف ہاشم کے علاوہ اس کے ایک اور رکن محمد باقر نابلسی بھی بیروت کے علاقے جناح میں جاں بحق ہوگئے۔ یوسف ہاشم حزب اللہ کے اعلیٰ ترین عہدے دار تھے اور اس جنگ کے آغاز سے ہی انہیں نشانہ بنایا جا رہا تھا۔
