حیدرآباد( سپورٹس ڈیسک)تاریخی نیاز کرکٹ اسٹیڈیم کو 20 سال کے لیے پاکستان کرکٹ بورڈ کے حوالے کردیا گیا، اس حوالے سے میونسپل کارپوریشن اور پی سی بی کے درمیان معاہدہ طے پاگیا۔اسٹیڈیم کا انتظام پی سی بی کے سپرد کرنے سے متعلق مفاہمتی یادداشت پر دستخط کی تقریب ہوئی، جس میں پی سی بی کے چیف ایگزیکٹو آفیسر سمیر احمد سید اور حیدرآباد کے میئر کاشف شورو نے شرکت کی۔اس موقع پر پی سی بی کے چیف ایگزیکٹو آفیسر نے بتایا کہ نیاز اسٹیڈیم آئندہ 20 برس تک بورڈ کے زیر انتظام رہے گا اور معاہدے کے تحت اسے بین الاقوامی معیار کے مطابق جدید سہولیات سے آراستہ کیا جائے گا۔انہوں نے کہا کہ اسٹیڈیم کی گنجائش میں اضافہ کرنے کے ساتھ کھلاڑیوں اور شائقین کو ضروری سہولیات فراہم کی جائیں گی، جبکہ ڈومیسٹک کرکٹ کے فروغ کے لیے علاقائی کرکٹ اکیڈمی کو بھی فعال کیا جائے گا۔نیاز کرکٹ اسٹیڈیم کو تاریخی اعتبار سے بھی نمایاں مقام حاصل ہے۔ لیجنڈری جاوید میانداد نے اسی میدان میں 288 رنز کی ناقابل شکست اننگز کھیلی تھی۔اس کے علاوہ برصغیر میں منعقد ہونے والے پہلے آئی سی سی ورلڈکپ کے افتتاحی میچ کی میزبانی کا اعزاز بھی نیاز اسٹیڈیم کو حاصل ہے، جہاں پاکستان اور سری لنکا کے درمیان مقابلہ کھیلا گیا تھا۔
