راولپنڈی( سپورٹس ڈیسک) سہ ملکی ون ڈے سیریز میں انگلینڈ کو شکست دینے کے بعد پاکستان نے آئی سی سی کی عالمی ون ڈے ٹیم رینکنگ میں آسٹریلیا کو پیچھے چھوڑ کر چوتھی پوزیشن حاصل کرلی ہے۔پاکستانی ٹیم نے سہ ملکی سیریز میں سری لنکا اور انگلینڈ کے خلاف مسلسل کامیابیاں حاصل کیں، جس کے نتیجے میں عالمی درجہ بندی میں اس کی پوزیشن بہتر ہوگئی۔انٹرنیشنل کرکٹ کونسل (آئی سی سی) کی ون ڈے رینکنگ کے مطابق، پاکستان 103 ریٹنگ پوائنٹس کے ساتھ چوتھے نمبر پر آگیا ہے، جبکہ آسٹریلیا اس سے ایک درجہ نیچے چلا گیا ہے۔رینکنگ میں بھارت 115 پوائنٹس کے ساتھ پہلی پوزیشن پر براجمان ہے، نیوزی لینڈ 109 پوائنٹس کے ساتھ دوسرے اور جنوبی افریقا 104 پوائنٹس کے ساتھ تیسرے نمبر پر موجود ہے۔پاکستان کی درجہ بندی میں یہ بہتری منگل کو انگلینڈ کے خلاف 87 رنز کی شاندار فتح کے بعد سامنے آئی۔ اس کامیابی کے ساتھ قومی ٹیم نے سہ ملکی ٹورنامنٹ میں اپنی فتوحات کا سلسلہ بھی برقرار رکھا۔
