جیمز اینڈرسن کے کیریئر پر سوالیہ نشان، لنکاشائر نے نیا معاہدہ نہ دینے کا فیصلہ کرلیا

لاہور ( سپورٹس ڈیسک) انگلینڈ کے مایہ ناز فاسٹ بولر جیمز اینڈرسن کے پروفیشنل کرکٹ کیریئر کے اختتام کے امکانات بڑھ گئے ہیں، کیونکہ کاؤنٹی کلب لنکاشائر نے انہیں آئندہ سیزن کے لیے نیا معاہدہ نہ دینے کا فیصلہ کیا ہے۔تفصیلات کے مطابق، 44 سالہ جیمز اینڈرسن کو رواں ہفتے کلب کے اعلیٰ حکام نے اس فیصلے سے آگاہ کیا۔ وہ 2024 میں بین الاقوامی کرکٹ سے ریٹائرمنٹ کے بعد اپنے آبائی کلب لنکاشائر کی جانب سے کھیل رہے تھے اور 2026 کے سیزن میں ٹیم کی قیادت بھی کر چکے ہیں۔اینڈرسن نے رواں سیزن میں عمدہ کارکردگی کا مظاہرہ کرتے ہوئے 17.68 کی اوسط سے 50 وکٹیں حاصل کیں، تاہم ان کی شاندار بولنگ بھی لنکاشائر کو کاؤنٹی چیمپئن شپ میں خراب نتائج سے نہ بچا سکی۔اطلاعات کے مطابق، انگلش فاسٹ بولر 2027 تک کرکٹ کھیلنے کے خواہش مند تھے، لیکن لنکاشائر کی جانب سے نیا معاہدہ نہ دینے کے فیصلے کے بعد ان کے مستقبل کے حوالے سے غیر یقینی صورتحال پیدا ہوگئی ہے۔ اب یہ واضح نہیں کہ وہ کسی دوسرے کاؤنٹی کلب میں شامل ہوں گے یا کھیل کو مکمل طور پر خیرباد کہہ دیں گے۔جیمز اینڈرسن نے جولائی 2024 میں اپنا آخری ٹیسٹ میچ کھیلنے کے بعد بین الاقوامی کرکٹ سے کنارہ کشی اختیار کی تھی۔ انہوں نے اپنے شاندار ٹیسٹ کیریئر میں 188 میچز کھیل کر 704 وکٹیں حاصل کیں اور دنیا کے کامیاب ترین فاسٹ بولرز میں نمایاں مقام حاصل کیا۔لنکاشائر میں انتظامی تبدیلیوں کے بعد اینڈرسن کے مستقبل پر سوالات اٹھنے لگے ہیں، جبکہ کلب کے نئے کپتان کے انتخاب کے لیے بھی مختلف ناموں پر غور کیا جا رہا ہے۔