تہران( مانیٹرنگ ڈیسک) ایران نے آبنائے ہرمز میں بحری آمدورفت بحال کرنے کے لیے اپنی شرائط مرتب کرنا شروع کردی ہیں۔ایرانی سپریم نیشنل سکیورٹی کونسل کے سیکریٹری محسن رضائی کے مطابق ثالث ممالک نے تہران سے آبنائے ہرمز کھولنے کے لیے مطالبات واضح کرنے کو کہا ہے، جن میں خطے میں جاری جنگ اور فوجی کشیدگی کا خاتمہ بھی شامل ہے۔محسن رضائی نے بتایا کہ ایران اور عمان تجارتی جہازوں کے لیے ایک عارضی بحری راستے پر بھی متفق ہوگئے ہیں، جس کا کچھ حصہ عمانی سمندری حدود اور باقی ایرانی پانیوں سے گزرے گا۔ اس راستے میں ایک مخصوص مرکزی گزرگاہ مقرر کی جائے گی۔ان کے مطابق تجارتی جہازوں کو اس راستے سے گزرنے کی اجازت ایران کی شرائط منظور ہونے کے بعد دی جاسکتی ہے، جس سے آبنائے ہرمز میں بحری سرگرمیوں کی مرحلہ وار بحالی ممکن ہوگی۔ایران کا مؤقف ہے کہ آبنائے ہرمز سے متعلق کسی بھی معاہدے میں اس کے قومی مفادات اور خودمختاری کو ملحوظ رکھا جانا ضروری ہے۔
