تہران( مانیٹرنگ ڈیسک) امریکی فضائی کارروائیوں کے بعد ایران نے دعویٰ کیا ہے کہ اس نے جوابی کارروائی کرتے ہوئے بحرین اور کویت میں موجود امریکی فوجی تنصیبات کو ڈرون حملوں کا نشانہ بنایا ہے۔ایرانی فوج کے مطابق بحرین کے سخیر فوجی اڈے پر موجود امریکی ہیلی کاپٹروں اور جاسوسی طیاروں کو ڈرونز کے ذریعے نشانہ بنایا گیا۔ تاہم ایران کے اس دعوے کی آزاد ذرائع سے تاحال تصدیق نہیں ہو سکی۔دوسری جانب روسی میڈیا کی رپورٹس میں دعویٰ کیا گیا ہے کہ کویت میں بھی ایرانی ڈرون حملوں کے دوران امریکی میزائل دفاعی نظام کی ایک بیٹری کو نشانہ بنایا گیا، جس کے بعد علاقے میں دھوئیں کے بادل اٹھتے ہوئے دیکھے گئے۔علاقائی صورتحال پر نظر رکھنے والے ماہرین کے مطابق امریکا اور ایران کے درمیان بڑھتی کشیدگی کے باعث خطے میں فوجی تنصیبات اور اہم مقامات کی سکیورٹی مزید سخت کر دی گئی ہے۔
