تہران( مانیٹرنگ ڈیسک) ایران نے دعویٰ کیا ہے کہ اس کی مسلح افواج نے کویت اور اردن میں موجود امریکی فوجی تنصیبات کو میزائلوں اور ڈرونز سے نشانہ بنایا ہے۔ایرانی سرکاری میڈیا کے مطابق یہ کارروائیاں امریکا کی جانب سے ایران پر حالیہ فضائی حملوں کے جواب میں کی گئیں۔ اسلامی انقلابی گارڈ کور (آئی آر جی سی) نے بیان میں کہا کہ عسکری کارروائی "نصر 2" کے آٹھویں مرحلے کے دوران کویت میں واقع علی السالم ایئر بیس پر مشترکہ میزائل اور ڈرون حملہ کیا گیا۔بیان کے مطابق حملے میں امریکی فوج کے زیر استعمال سی-ریم ریڈار سسٹم اور امریکی اہلکاروں کے ایک اجتماع کو نشانہ بنایا گیا۔ تاہم ان دعوؤں کی آزاد ذرائع سے تصدیق نہیں ہو سکی۔آئی آر جی سی نے الزام عائد کیا کہ امریکا نے ایران کے خلاف کارروائیوں کے لیے کویت کی سرزمین استعمال کی، جبکہ کویتی عوام سے مطالبہ کیا کہ وہ اپنے ملک سے امریکی افواج کے انخلا کا مطالبہ کریں۔دوسری جانب ایرانی فوج نے بھی دعویٰ کیا ہے کہ اس نے اردن میں موجود امریکی فوجی تنصیبات پر خودکش ڈرون حملے کیے، جن میں امریکی فوج کے مواصلاتی نظام اور ایندھن ذخیرہ کرنے والی تنصیبات کو نشانہ بنایا گیا۔ایرانی حکام کے مطابق یہ کارروائیاں امریکا کے حالیہ فضائی حملوں کا جواب ہیں۔تاحال امریکا، کویت یا اردن کی جانب سے ان ایرانی دعوؤں کی نہ تو باضابطہ تصدیق کی گئی ہے اور نہ ہی تردید سامنے آئی ہے، جبکہ حملوں کے نتیجے میں ممکنہ جانی یا مالی نقصان کے بارے میں بھی کوئی آزادانہ تصدیق دستیاب نہیں ہے۔
