اسلام آباد بلدیاتی انتخابات: الیکشن کمیشن نے اہم حلقہ بندی دستاویزات فوری طلب کر لیں

اسلام آباد (پاکستان خبر) بلدیاتی انتخابات کی تیاریوں کے سلسلے میں الیکشن کمیشن آف پاکستان نے حلقہ بندیوں سے متعلق اہم دستاویزات فوری طور پر طلب کر لی ہیں۔الیکشن کمیشن نے وزارت داخلہ اور چیف کمشنر اسلام آباد کو ہدایت کی ہے کہ ٹاؤن کارپوریشنز کی حدود سے متعلق نوٹیفکیشن تین دن کے اندر جمع کرایا جائے۔ اس کے ساتھ ہر ٹاؤن کارپوریشن میں یونین کونسلز کی تعداد کا نوٹیفکیشن بھی فوری فراہم کرنے کا حکم دیا گیا ہے۔مزید برآں، مردم شماری کے مطابق چارجز، سرکلز اور بلاکس پر مشتمل ٹاؤن کارپوریشنز کے تصدیق شدہ نقشے بھی طلب کیے گئے ہیں۔الیکشن کمیشن کے مطابق 13 مئی کے اجلاس میں اسلام آباد انتظامیہ کو 10 روز کی مہلت دی گئی تھی، تاہم مقررہ مدت گزرنے کے باوجود مطلوبہ دستاویزات فراہم نہیں کی گئیں۔ اسی وجہ سے حلقہ بندیوں کا عمل تاخیر کا شکار ہے۔کمیشن نے واضح کیا ہے کہ اسلام آباد لوکل گورنمنٹ انتخابات کے لیے حلقہ بندیوں کی پیش رفت کا انحصار ان دستاویزات کی فوری فراہمی پر ہے، جبکہ متعلقہ قانون سازی اور قواعد میں ترامیم پر بھی جلد پیش رفت کی ہدایت کی گئی ہے۔