غزہ( مانیٹرنگ ڈیسک)غزہ کے شمالی علاقے اور نصیرت کیمپ میں اسرائیلی بمباری کے نتیجے میں 4 فلسطینی شہید اور متعدد زخمی ہوگئے ہیں۔غیر ملکی خبر ایجنسی کی رپورٹ کے مطابق فلسطینی وزارت صحت کے عہدیداروں نے بتایا کہ اسرائیل نے وسطی غزہ میں نصیرت کیمپ کے مرکز پر پولیس گاڑی کو نشانہ بنایا، جس کے نتیجے میں 3 افراد شہید اور دو زخمی ہوئے۔ چند گھنٹوں بعد شمالی غزہ میں ایک اور فضائی کارروائی کی گئی، جس میں مزید فلسطینی شہید ہوئے۔وزارت صحت اور پولیس کے ذرائع کے مطابق نصیرت کیمپ میں شہید ہونے والے افراد پولیس فورس کے اہلکار تھے۔ شمالی غزہ کے قریبی علاقے شیخ رادوان میں کی گئی کارروائی میں متعدد افراد زخمی ہوئے اور ایک شخص کی شناخت الفتح کے رہنما کے طور پر ہوئی۔فلسطینی وزارت صحت کے مطابق اکتوبر سے اب تک اسرائیلی کارروائیوں میں 680 فلسطینی شہید ہوچکے ہیں، جبکہ اسرائیل کا دعویٰ ہے کہ غزہ میں ان کے 4 فوجی اہلکار ہلاک ہوئے۔ جنگ بندی کے باوجود اسرائیل کی کارروائیاں جاری ہیں اور غزہ میں انسانی نقصان بڑھتا جا رہا ہے۔
