لاہور ( سپورٹس ڈیسک) انگلینڈ کے سابق کپتان کیون پیٹرسن نے ٹیسٹ کرکٹ کے دوران اسٹیڈیمز میں تماشائیوں کی کم ہوتی تعداد پر تشویش کا اظہار کرتے ہوئے شائقین کو میدانوں تک لانے کے لیے اہم تجویز پیش کردی ہے۔کیون پیٹرسن نے سماجی رابطے کی ویب سائٹ ایکس پر اپنی پوسٹ میں کہا کہ کرکٹ بورڈز کو ٹی 20 فرنچائز ٹورنامنٹس سے حاصل ہونے والی آمدنی استعمال کرتے ہوئے ایسے مقامات پر ٹیسٹ میچز کے لیے مفت داخلے کی سہولت دینی چاہیے، جہاں شائقین کی حاضری کم رہتی ہے۔سابق انگلش کپتان کے مطابق، ڈربن اور پورٹ الزبتھ میں ٹکٹوں کی فروخت سے اتنی آمدنی حاصل نہیں ہوئی کہ اسٹیڈیمز میں تماشائیوں کی غیر موجودگی کو جائز قرار دیا جا سکے۔ ان کا خیال ہے کہ مفت داخلے کی سہولت سے شائقین کی دلچسپی بڑھانے میں مدد مل سکتی ہے۔کیون پیٹرسن کا یہ بیان جنوبی افریقا اور آسٹریلیا کے درمیان جاری ٹیسٹ سیریز کے دوران میدانوں میں تماشائیوں کی کم تعداد پر سابق آسٹریلوی اوپنر ڈیوڈ وارنر کی تنقید کے بعد سامنے آیا ہے۔ڈیوڈ وارنر نے بھی سوشل میڈیا پر خالی اسٹیڈیمز پر تشویش ظاہر کرتے ہوئے سوال اٹھایا تھا کہ اگر شائقین میدانوں کا رخ نہیں کر رہے تو ٹیسٹ کرکٹ کو کھیل کا اعلیٰ ترین فارمیٹ قرار دینے کا کیا جواز رہ جاتا ہے۔جنوبی افریقا اور آسٹریلیا کے درمیان پہلے ٹیسٹ میچ میں ڈربن کے کنگزمیڈ اسٹیڈیم میں پانچ روز کے دوران 20 ہزار سے بھی کم تماشائی آئے، جو میدان کی مجموعی گنجائش کے پانچویں حصے سے بھی کم تھے۔ دوسرے ٹیسٹ میں پورٹ الزبتھ کے سینٹ جارجز پارک میں بھی بڑی تعداد میں نشستیں خالی رہیں۔اس صورتحال نے جنوبی افریقا میں ٹیسٹ کرکٹ کی مقبولیت بڑھانے اور اسے شائقین کے لیے زیادہ قابلِ رسائی بنانے کے حوالے سے بحث کو جنم دیا ہے۔ متعلقہ کرکٹ حکام نے بھی تماشائیوں کی کم حاضری کی وجوہات جاننے کے لیے اندرونی جائزے کا اعلان کیا ہے۔
