کراچی میں فاسٹ ٹریک پروجیکٹس اینڈ لاجسٹکس کو کسٹمز پورٹ کا درجہ دے دیا گیا

اسلام آباد( کامرس ڈیسک) وفاقی حکومت نے کراچی میں واقع فاسٹ ٹریک پروجیکٹس اینڈ لاجسٹکس کو پانچ سال کے لیے کسٹمز پورٹ قرار دے دیا ہے، جس کا باضابطہ نوٹیفکیشن فیڈرل بورڈ آف ریونیو (ایف بی آر) نے جاری کر دیا۔ایف بی آر کے اعلامیے کے مطابق یہ فیصلہ کسٹمز ایکٹ 1969 کی متعلقہ شقوں کے تحت حاصل اختیارات استعمال کرتے ہوئے کیا گیا ہے، جبکہ اس حوالے سے 13 نومبر 2020 کا سابقہ ایس آر او منسوخ کر دیا گیا ہے۔نوٹیفکیشن کے مطابق کراچی میں واقع میسرز فاسٹ ٹریک پروجیکٹس اینڈ لاجسٹکس (پرائیویٹ) لمیٹڈ کو کسٹمز پورٹ کا درجہ دیا گیا ہے، جو تقریباً 10 ایکڑ رقبے پر مشتمل ہے۔یہ کسٹمز پورٹ نارتھ ویسٹرن انڈسٹریل زون (این ڈبلیو آئی زیڈ)، آف پورٹ قاسم مین روڈ، کراچی میں واقع مختلف پلاٹس پر مشتمل ہے۔ایف بی آر کے مطابق اس کسٹمز پورٹ کو درآمدی اور برآمدی سامان سمیت مخصوص اشیا کی کسٹمز کلیئرنس کے لیے استعمال کیا جائے گا۔نوٹیفکیشن میں کسٹمز پورٹ کی حدود بھی واضح کر دی گئی ہیں، جن میں شمال، جنوب، مشرق اور مغرب کی جانب موجود سڑکیں اور متعلقہ پلاٹس شامل ہیں۔اعلامیے کے مطابق یہ فیصلہ جاری ہونے کی تاریخ سے پانچ سال تک مؤثر رہے گا۔