ممبئی( شو بز ڈیسک)بالی ووڈ اداکار شاہ رخ خان اپنی 61ویں سالگرہ کے موقع پر اس سال مداحوں سے روایتی انداز میں ملاقات نہیں کرسکیں گے۔بھارتی میڈیا کے مطابق اداکار اپنی نئی فلم ’کنگ‘ کی شوٹنگ میں مصروف ہونے کے باعث 2 نومبر کو ممبئی میں سالگرہ کی تقریب میں شرکت نہیں کریں گے۔ رپورٹ کے مطابق وہ سالگرہ کے روز لندن میں موجود ہوں گے، جہاں فلم ’کنگ‘ کے ایک گانے کی شوٹنگ شیڈول ہے۔واضح رہے کہ ہر سال 2 نومبر کو شاہ رخ خان کے مداح بڑی تعداد میں ممبئی میں ان کی رہائش گاہ ’منت‘ کے باہر جمع ہوتے ہیں تاکہ اپنے پسندیدہ اداکار کی ایک جھلک دیکھ سکیں۔گزشتہ 2 برسوں کے دوران اداکار نے بالکنی سے مداحوں کو جھلک دکھانے کے بجائے ممبئی میں ان کے لیے خصوصی ملاقاتوں کا اہتمام کیا تھا، جہاں مداحوں کو ان سے گفتگو کرنے، سوالات پوچھنے اور وقت گزارنے کا موقع ملا۔رپورٹ کے مطابق اس سال بھی مداحوں سے ملاقات کی بڑی تقریب منعقد کرنے پر غور کیا گیا، تاہم مناسب بڑے مقام کا انتظام نہ ہونے اور فلم کی شوٹنگ کے مصروف شیڈول کے باعث منصوبہ آگے نہ بڑھ سکا۔تاہم مداحوں کے لیے امید کی خبر یہ ہے کہ شاہ رخ خان کی ٹیم فلم ’کنگ‘ کی ریلیز سے قبل ان کے ساتھ ایک بڑی ملاقات منعقد کرنے پر غور کر رہی ہے۔ اس حوالے سے تاریخ، مقام اور دیگر تفصیلات کی باضابطہ تصدیق نہیں ہوئی۔
