3 بار ایشین پیرا گیمز میں گولڈ میڈل جیتنے والے نیرج یادیو گھر میں مردہ پائے گئے

 لاہور( سپورٹس ڈیسک)بھارت کے 42 سالہ پیرا ایتھلیٹ نیرج یادیو منگل کو نئی دہلی میں اپنی رہائش گاہ پر مردہ پائے گئے۔بھارتی میڈیا کے مطابق ابتدائی طور پر ان کی موت کو خودکشی کا واقعہ قرار دیا گیا ہے، تاہم موت کی اصل وجوہات تاحال سامنے نہیں آسکیں۔بھارتی پیرا ایتھلیٹکس کے کوچ ایس ستیہ نارائن نے نیرج یادیو کے انتقال کی تصدیق کرتے ہوئے کہا کہ وہ اس خبر پر صدمے میں ہیں۔اتر پردیش سے تعلق رکھنے والے نیرج یادیو 7 سال کی عمر میں پولیو کے باعث جسمانی معذوری کا شکار ہوگئے تھے۔ وہ پیرا ایتھلیٹکس کی ایف 55 کیٹیگری میں نیزہ پھینکنے اور ڈسکس تھرو کے مقابلوں میں حصہ لیتے تھے۔نیرج یادیو نے 2018ء میں جکارتہ اور 2022ء میں ہانگژو ایشین پیرا گیمز میں نیزہ پھینکنے کے مقابلوں میں سونے کے تمغے جیتے، جبکہ ہانگژو میں ڈسکس تھرو میں بھی طلائی تمغہ حاصل کیا۔وہ 2005ء سے 2012ء تک وہیل چیئر ٹینس سے وابستہ رہے، جس کے بعد پیرا ایتھلیٹکس میں حصہ لینا شروع کیا۔