لاہور ( سپورٹس ڈیسک) انگلینڈ کے فاسٹ بولر مارک ووڈ نے مسلسل انجریز کے بعد 36 سال کی عمر میں بین الاقوامی کرکٹ سے ریٹائرمنٹ کا اعلان کردیا۔مارک ووڈ نے تینوں فارمیٹس میں انگلینڈ کی نمائندگی کرتے ہوئے 146 میچز میں 253 وکٹیں حاصل کیں، جن میں 38 ٹیسٹ میچز کی 119 وکٹیں شامل ہیں۔ انہوں نے 2015 میں انگلینڈ کی جانب سے کھیلنا شروع کیا اور اسی سال ایشز سیریز جیتنے والی ٹیم کا حصہ بنے۔وہ 2019 کے ایک روزہ ورلڈ کپ اور 2022 کے ٹی ٹوئنٹی ورلڈ کپ کی فاتح انگلش ٹیموں میں بھی شامل رہے۔ 2019 کے ورلڈ کپ میں انہوں نے 18 وکٹیں حاصل کیں، جبکہ 2021-22 کی ایشز سیریز میں 17 وکٹیں لیں۔2025 کی چیمپئنز ٹرافی کے دوران گھٹنے کی انجری کے باعث انہیں سرجری کرانا پڑی، جبکہ گزشتہ ایشز کے پہلے ٹیسٹ میں واپسی کے بعد دوبارہ زخمی ہوگئے۔مارک ووڈ کا کہنا ہے کہ مسلسل انجریز نے انہیں ذہنی طور پر تھکا دیا تھا اور اب انہیں بین الاقوامی کرکٹ سے ریٹائرمنٹ کا یہی مناسب وقت محسوس ہوا۔وہ ڈرہم کیلئے ٹی ٹوئنٹی بلاسٹ اور دیگر فرنچائز لیگز میں کھیلنے کے ساتھ نشریاتی اور کوچنگ کے شعبوں سے بھی وابستہ رہیں گے۔
