ممبئی( شو بز ڈیسک) بالی ووڈ اداکار مشتاق خان کی وفات کے بعد فلم ’ویلکم‘ کے معاوضے سے متعلق ان کا پرانا بیان دوبارہ سوشل میڈیا پر زیرِ گردش ہے۔مشتاق خان نے 2007ء کی کامیڈی فلم ’ویلکم‘ میں بالو کا مزاحیہ کردار ادا کیا تھا۔ اداکار کے مطابق انہیں فلم کے پروڈیوسر فیروز نادیادوالا کی جانب سے طے شدہ معاوضہ ادا نہیں کیا گیا۔ماضی کی ایک گفتگو میں مشتاق خان نے بتایا تھا کہ ابتدا میں فلم کی شوٹنگ 20 سے 25 دن میں مکمل ہونے کی بات ہوئی تھی، لیکن 25 دن گزرنے کے بعد انہیں مزید 10 دن اور پھر 15 دن کام کرنا پڑا، تاہم معاوضے میں کوئی اضافہ نہیں کیا گیا۔انہوں نے کہا تھا کہ فلم مکمل کرنے کے عوض ایک لاکھ روپے طے ہوئے تھے، چاہے شوٹنگ 20 دن جاری رہتی یا 25 دن، جبکہ فلم کا عملہ یومیہ اجرت پر کام کرتا تھا۔کم معاوضے کے باوجود مشتاق خان نے 2015ء میں ریلیز ہونے والی فلم ’ویلکم بیک‘ میں بھی بالو کا کردار دوبارہ نبھایا تھا۔مشتاق خان گزشتہ روز 56 برس کی عمر میں پھیپھڑوں کے سرطان کے باعث طویل علالت کے بعد انتقال کرگئے۔
