ماؤنٹ ایورسٹ پر لاپتا نیپالی کوہ پیما داوا شرپا 6 روز بعد زندہ مل گیا

نیپال( مانیٹرنگ ڈیسک)نیپالی کوہ پیما داوا شرپا ماؤنٹ ایورسٹ پر چھ روز لاپتا رہنے کے بعد زندہ حالت میں مل گیا ہے۔غیر ملکی میڈیا کے مطابق داوا شرپا کے اہل خانہ نے انہیں مردہ تصور کرتے ہوئے آخری رسومات کی تیاریاں بھی شروع کر دی تھیں، تاہم وہ طویل تلاش کے بعد زندہ حالت میں برآمد ہوئے۔داوا شرپا نے بتایا کہ انہوں نے برف سے ڈھکے پہاڑ پر چھ دن تک برف چبا کر اور جیب میں موجود چاکلیٹس کھا کر گزارا کیا۔ ان کے مطابق وہ لاپتا نہیں ہوئے تھے بلکہ آکسیجن سلنڈر ختم ہونے کے باعث وہ آگے بڑھنے کے قابل نہیں رہے۔میڈیا رپورٹس کے مطابق داوا شرپا کو کٹھمنڈو کے ایک اسپتال میں منتقل کر دیا گیا ہے، جہاں ان کا علاج جاری ہے۔ انہیں ڈی ہائیڈریشن، فراسٹ بائٹ اور ایک ٹوٹی ہوئی ہڈی کا سامنا ہے۔ہر سال دنیا بھر سے سینکڑوں کوہ پیما ماؤنٹ ایورسٹ سر کرنے کے لیے نیپال کا رخ کرتے ہیں، اور اس مہم کے دوران متعدد افراد شدید موسم اور خطرناک حالات کے باعث اپنی جان بھی گنوا دیتے ہیں۔