نیوزی لینڈ کا سخت اقدام، 3 اسرائیلی انتہا پسند آبادکاروں پر سفری پابندیاں عائد

آکلینڈ ( مانیٹرنگ ڈیسک) نیوزی لینڈ نے مقبوضہ مغربی کنارے میں سرگرم تین اسرائیلی آبادکاروں پر سفری پابندیاں عائد کر دی ہیں۔نیوزی لینڈ کے وزیر خارجہ ونسٹن پیٹرز نے ان افراد کو انتہا پسند قرار دیتے ہوئے کہا ہے کہ یہ اب نیوزی لینڈ کا سفر نہیں کر سکیں گے۔ جن افراد پر پابندی عائد کی گئی ہے ان میں ایتمار یہودا لیوی، ہاریل ڈیوڈ لیبی اور ایلیاو لیبی شامل ہیں۔وزیر خارجہ کے مطابق ان افراد نے مقبوضہ مغربی کنارے میں غیر قانونی بستیوں کی توسیع میں فعال کردار ادا کیا، جس میں تشدد کے واقعات بھی شامل ہیں۔ونسٹن پیٹرز نے کہا کہ ان سرگرمیوں سے نہ صرف فلسطینی بلکہ اسرائیلی عوام کی بھی سلامتی خطرے میں پڑ رہی ہے اور یہ خطے کو مزید عدم استحکام کی طرف دھکیل رہی ہیں۔نیوزی لینڈ نے اپنے مؤقف کو دہراتے ہوئے کہا ہے کہ وہ دو ریاستی حل کی حمایت کرتا ہے اور سمجھتا ہے کہ بستیوں کی توسیع اور آبادکاروں کا تشدد مشرق وسطیٰ میں پائیدار امن کی راہ میں بڑی رکاوٹ ہیں۔