راولپنڈی( پاکستان خبر) پاک فوج، ایف سی بلوچستان اور پولیس کا مشترکہ آپریشن شعبان بلوچستان میں دہشت گردوں کے خلاف مسلسل جاری ہے۔سکیورٹی ذرائع کے مطابق فتنہ الخوارج کے خلاف کارروائیوں میں دہشت گردوں کو ہوائی اور زمینی آپریشنز کے ذریعے نشانہ بنایا جا رہا ہے۔ذرائع کا کہنا ہے کہ تازہ کارروائیوں کے دوران مزید 5 دہشت گردوں کو ہلاک کر دیا گیا، جس کے بعد آپریشن شعبان میں مارے جانے والے دہشت گردوں کی تعداد 76 تک پہنچ گئی ہے۔سکیورٹی ذرائع کے مطابق 5 جولائی سے اب تک آپریشن شعبان اور دیگر خفیہ اطلاعات پر کیے گئے آپریشنز میں مجموعی طور پر 114 دہشت گرد ہلاک کیے جا چکے ہیں۔ذرائع کا کہنا ہے کہ بلوچستان میں آخری دہشت گرد کے خاتمے تک آپریشن شعبان جاری رکھا جائے گا۔وفاقی وزیر داخلہ محسن نقوی نے بلوچستان میں دہشت گردوں کے خلاف کامیاب کارروائیوں پر سکیورٹی فورسز کو خراج تحسین پیش کیا ہے۔اپنے بیان میں محسن نقوی نے کہا کہ پاک فوج، ایف سی بلوچستان اور پولیس کے مشترکہ آپریشن میں مزید دہشت گردوں کی ہلاکت پر فورسز کو سلام پیش کرتے ہیں۔ انہوں نے کہا کہ ملک سے دہشت گردی کے مکمل خاتمے تک جنگ جاری رہے گی۔انہوں نے مزید کہا کہ بلوچستان کا امن خراب کرنے والے عناصر عبرت کا نشان بن رہے ہیں، پوری قوم سکیورٹی فورسز کے ساتھ کھڑی ہے جبکہ امن دشمن عناصر کسی رعایت کے مستحق نہیں۔
