میانمار کے قریب دو کشتیاں الٹ گئیں، 500 سے زائد روہنگیا پناہ گزینوں کی ہلاکت کا خدشہ

میانمار( مانیٹرنگ ڈیسک)میانمار کے ساحل کے قریب 500 سے زائد افراد کو لے جانے والی دو کشتیاں الٹ جانے کے بعد بڑے انسانی سانحے کا خدشہ پیدا ہوگیا ہے، جبکہ سوار تمام افراد کی ہلاکت کا اندیشہ ظاہر کیا جا رہا ہے۔اقوام متحدہ کے اداروں کے مطابق جنگ اور عدم تحفظ سے متاثرہ روہنگیا پناہ گزین محفوظ مستقبل اور بہتر مواقع کی تلاش میں خطرناک سمندری راستوں کا رخ کر رہے تھے۔بین الاقوامی ادارہ برائے مہاجرت اور اقوام متحدہ کے ادارہ برائے مہاجرین نے مشترکہ بیان میں بتایا کہ ابتدائی اطلاعات کے مطابق دونوں کشتیاں جون کے آخر میں میانمار کی ریاست راکھین سے روانہ ہوئی تھیں، جن میں زیادہ تر روہنگیا پناہ گزین سوار تھے۔بیان کے مطابق بعض مسافر بنگلہ دیش کے کاکس بازار میں قائم پناہ گزین کیمپوں سے بھی اس سفر پر روانہ ہوئے تھے۔اقوام متحدہ کے دونوں اداروں نے کہا ہے کہ اگرچہ حادثات اور جانی نقصان کی سرکاری تصدیق ابھی باقی ہے، تاہم ممکنہ طور پر بڑی تعداد میں انسانی جانوں کے ضیاع پر شدید تشویش پائی جا رہی ہے۔