اسلام آباد (سپورٹس ڈیسک) پاکستان اور جنوبی کوریا کے درمیان ہاکی ٹیسٹ سیریز 2026 کے شیڈول کا اعلان کر دیا گیا ہے۔پاکستان ہاکی فیڈریشن (پی ایچ ایف) نے صدر محی الدین احمد وانی کی منظوری کے بعد چار میچز پر مشتمل ٹیسٹ سیریز کے شیڈول اور تکنیکی آفیشلز کے پینل کا اعلان کیا ہے۔دونوں ٹیموں کے درمیان یہ ٹیسٹ سیریز 30 جولائی سے 7 اگست 2026 تک اسلام آباد کے نصیر بندہ ہاکی اسٹیڈیم میں کھیلی جائے گی۔شیڈول کے مطابق پہلا ٹیسٹ میچ 30 جولائی، دوسرا یکم اگست، تیسرا 4 اگست جبکہ چوتھا اور آخری ٹیسٹ میچ 7 اگست کو کھیلا جائے گا۔ تمام میچز شام 5 بج کر 15 منٹ پر شروع ہوں گے۔پی ایچ ایف نے سیریز کے شفاف اور بہتر انعقاد کے لیے تجربہ کار تکنیکی عملہ مقرر کیا ہے۔ انٹرنیشنل امپائر مینیجر فیض محمد کو امپائر مینیجر مقرر کیا گیا ہے، جبکہ امپائرز پینل میں ہارون رشید، یاسر خورشید، فہد علی خان، اسد عباس اور ساجد رضا شامل ہیں۔ٹیکنیکل ڈیلیگیٹ کے طور پر محمد شفیق بھٹی جبکہ ٹیکنیکل آفیشلز اور ججز میں حمزہ طفیل، ایم وقاص احمد، عدنان شہزاد، محبوب جاوید اور مرزا جاوید شامل ہوں گے۔میڈیا کوریج کے لیے میڈیا کوآرڈینیٹر ٹیم میں وقاص شیخ، چیف کوآرڈینیٹر نجیب خٹک اور اسسٹنٹ ٹو چیف کوآرڈینیٹر حبیب الرحمان شامل ہوں گے۔
