ایران امریکا کشیدگی کسی کے مفاد میں نہیں، پاکستان کا مذاکرات کا مطا لبہ

اسلام آباد( پاکستان خبر) پاکستان کی وزارت خارجہ نے کہا ہے کہ ایران اور امریکا کے درمیان جاری تنازع کسی کے مفاد میں نہیں، پاکستان آبنائے ہرمز کے ذریعے تجارت اور تیل کی بلا تعطل ترسیل کا خواہاں ہے۔دفتر خارجہ کے ترجمان طاہر حسین اندرابی نے ہفتہ وار بریفنگ کے دوران کہا کہ ایران اور امریکا کے درمیان دوبارہ بڑھتی ہوئی کشیدگی پر پاکستان کو تشویش ہے۔ پاکستان موجودہ علاقائی صورتحال کا بغور جائزہ لے رہا ہے اور فریقین پر تحمل کا مظاہرہ کرنے پر زور دیا ہے۔ترجمان نے کہا کہ اسلام آباد مفاہمتی یادداشت پر عملدرآمد جاری رکھنے کا خواہاں ہے۔ پاکستان تمام مسائل کے حل کے لیے مذاکرات اور سفارت کاری کو بہترین راستہ سمجھتا ہے۔طاہر حسین اندرابی کا کہنا تھا کہ ایران امریکا تنازع کسی بھی فریق کے مفاد میں نہیں، جبکہ پاکستان آبنائے ہرمز کے ذریعے عالمی تجارت اور تیل کی آسان ترسیل کو یقینی بنانے کے حق میں ہے۔انہوں نے کہا کہ آبنائے ہرمز کی غیر معمولی صورتحال سے عالمی جنوب کے ممالک بھی متاثر ہو رہے ہیں۔ تمام تنازعات کا حل مذاکرات اور سفارتی کوششوں میں پوشیدہ ہے، پاکستان تمام فریقین کو جنگ سے گریز اور پرامن حل کی ترغیب دیتا رہے گا۔