واشنگٹن( کامرس ڈیسک) وفاقی وزیر خزانہ محمد اورنگزیب نے آئی ایم ایف کے اعلیٰ حکام سے اہم ملاقاتیں کیں، جن میں پاکستان کی معاشی صورتحال اور جاری اصلاحاتی پروگرام پر تفصیلی تبادلہ خیال کیا گیا۔وزیر خزانہ نے آئی ایم ایف کے فرسٹ ڈپٹی منیجنگ ڈائریکٹر ڈین کٹز، ڈپٹی منیجنگ ڈائریکٹر نائجل کلارک، مشرق وسطیٰ و وسطی ایشیا کے شعبے کے ڈائریکٹر جہاد ازور اور پاکستان کے لیے مشن چیف ایوا پیٹرووا سے الگ الگ ملاقاتیں کیں۔ملاقاتوں کے دوران ایکسٹینڈڈ فنڈ فیسلٹی (ای ایف ایف)، ریزیلیئنس اینڈ سسٹینبیلٹی فیسلٹی (آر ایس ایف) اور آئی ایم ایف پروگرام پر پیش رفت کا جائزہ لیا گیا۔محمد اورنگزیب نے پاکستان کی بہتر مالی صورتحال، بیرونی شعبے میں استحکام، محصولات کے اہداف کے حصول، مضبوط زرمبادلہ ذخائر، ریکارڈ ترسیلات زر اور کرنٹ اکاؤنٹ کی بہتری کو اجاگر کیا۔مذاکرات میں ٹیکس اصلاحات، توانائی کے شعبے میں بہتری، نجکاری، ٹیرف اصلاحات، قرضوں کے بہتر انتظام، مالیاتی ذرائع میں وسعت اور عالمی سرمایہ کاری مارکیٹوں تک پاکستان کی واپسی جیسے امور پر بھی بات چیت ہوئی۔فریقین نے انسانی وسائل کی ترقی، خواتین کی معاشی شمولیت، آبادی سے متعلق چیلنجز، ٹیکنالوجی پر مبنی ترقی اور نجی شعبے کے ذریعے برآمدات بڑھانے پر بھی تبادلہ خیال کیا۔وزیر خزانہ نے پاکستان کے اصلاحاتی ایجنڈے میں تعاون پر آئی ایم ایف انتظامیہ کا شکریہ ادا کرتے ہوئے حکومت کے مالیاتی نظم و ضبط، پالیسی تسلسل، ساختی اصلاحات اور طویل المدتی معاشی ترقی کے عزم کا اعادہ کیا۔
