لاہور( سپورٹس ڈیسک)کرکٹ ورلڈکپ 2027 میں پاکستان اور بھارت کے درمیان متوقع مقابلے کے ٹکٹس کی مانگ نے ابتدائی مرحلے ہی میں ریکارڈ دلچسپی پیدا کردی، میچ کے لیے اب تک ایک لاکھ 10 ہزار سے زائد درخواستیں موصول ہوچکی ہیں۔جنوبی افریقا، زمبابوے اور نمیبیا میں ہونے والے ورلڈکپ کے مختلف میچز کے لیے مجموعی طور پر 11 لاکھ سے زائد ٹکٹ درخواستیں جمع ہوچکی ہیں۔ٹکٹوں کے حصول کے لیے سب سے زیادہ جوش و خروش پاکستان اور بھارت کے درمیان ہونے والے مقابلے کے حوالے سے دیکھا جارہا ہے۔ جنوبی افریقا اور بھارت کے میچ کے لیے 92 ہزار سے زائد جبکہ بھارت اور آسٹریلیا کے مقابلے کے لیے 86 ہزار سے زیادہ درخواستیں موصول ہوئی ہیں۔بھارت اور پاکستان کے درمیان 7 نومبر کو شیڈول پری سیڈڈ سپر 7 میچ کے لیے بھی شائقین کی بھرپور دلچسپی دیکھنے میں آرہی ہے، جس کے لیے تقریباً 78 ہزار درخواستیں جمع ہوچکی ہیں۔دوسری جانب 21 نومبر کو ہونے والے ورلڈکپ فائنل کے لیے بھی تقریباً 69 ہزار ٹکٹ درخواستیں موصول ہوئی ہیں۔آئی سی سی کے چیف ایگزیکٹو سنجوگ گپتا نے کہا کہ ٹکٹ بیلٹ کھلنے کے صرف 48 گھنٹوں سے زائد عرصے میں 10 لاکھ درخواستیں موصول ہونا اس بات کا واضح ثبوت ہے کہ کرکٹ ورلڈکپ کی عالمی مقبولیت اور کشش میں اضافہ ہوا ہے۔ان کے مطابق آئی سی سی کے بڑے مقابلے اب محض کھیلوں کے مقابلے نہیں رہے بلکہ مختلف ثقافتوں اور خطوں سے تعلق رکھنے والے لوگوں کو جوڑنے والے عالمی میلے بن چکے ہیں۔آرگنائزنگ کمیٹی کے چیف ایگزیکٹو قونڈیسا نگونیا نے بھی ٹکٹوں کی غیر معمولی طلب پر خوشی کا اظہار کرتے ہوئے کہا کہ 10 لاکھ سے زائد درخواستیں عالمی شائقین کی ٹورنامنٹ میں شرکت کی غیر معمولی خواہش کی عکاسی کرتی ہیں۔ٹکٹ بیلٹ میں رجسٹریشن 21 نومبر کو رات 11 بج کر 59 منٹ، سینٹرل افریقن ٹائم تک جاری رہے گی۔ شائقین کے لیے رجسٹریشن مکمل طور پر مفت ہے اور ہر میچ کے لیے ایک مرتبہ درخواست دی جاسکتی ہے، جبکہ ایک سے زائد میچز کے لیے بھی درخواست دینا ممکن ہے۔ٹکٹ بیلٹ پہلے آئیے، پہلے پائیے کی بنیاد پر نہیں ہوگا، اس لیے رجسٹریشن کے وقت کا کامیابی کے امکانات پر کوئی اثر نہیں پڑے گا۔ اگر کسی میچ کے لیے دستیاب ٹکٹوں سے زیادہ درخواستیں موصول ہوئیں تو کامیاب امیدواروں کا انتخاب قرعہ اندازی کے ذریعے کیا جائے گا۔کامیاب اور ناکام امیدواروں کو رجسٹریشن کے دوران فراہم کیے گئے ای میل پتے پر مطلع کیا جائے گا۔
