پاکستان اسٹاک مارکیٹ میں تیزی، ہنڈرڈ انڈیکس ایک لاکھ 71 ہزار پوائنٹس سے تجاوز

کراچی ( کامرس ڈیسک) پاکستان اسٹاک مارکیٹ میں کاروباری ہفتے کے دوسرے روز مثبت رجحان دیکھنے میں آیا، جس کے نتیجے میں ہنڈرڈ انڈیکس ایک لاکھ 71 ہزار پوائنٹس کی حد بحال ہو گئی۔کاروبار کے آغاز پر ہی مارکیٹ میں تیزی دیکھی گئی اور انڈیکس میں 700 سے زائد پوائنٹس کا اضافہ ریکارڈ کیا گیا، جس کے بعد پاکستان اسٹاک ایکسچینج کا ہنڈرڈ انڈیکس ایک لاکھ 71 ہزار 339 پوائنٹس کی سطح تک پہنچ گیا۔واضح رہے کہ گزشتہ کاروباری دن کے اختتام پر مارکیٹ میں مندی کا رجحان دیکھا گیا تھا اور انڈیکس 3362 پوائنٹس کی کمی کے بعد ایک لاکھ 70 ہزار 600 پوائنٹس پر بند ہوا تھا۔دوسری جانب عالمی مارکیٹس میں امریکا اور ایران کے درمیان کشیدگی کے باعث غیر یقینی صورتحال برقرار ہے، جس کے اثرات ایشیائی اسٹاک مارکیٹس پر بھی دیکھے جا رہے ہیں۔خبر ایجنسی کے مطابق جنوبی کوریا کے کوسپی انڈیکس میں 2 فیصد سے زائد کمی ریکارڈ کی گئی، جبکہ جاپان کے نکی انڈیکس میں بھی ڈیڑھ فیصد گراوٹ دیکھی گئی۔ چین اور انڈونیشیا کی اسٹاک مارکیٹس بھی معمولی مندی کا شکار رہیں۔تاہم ہانگ کانگ کے ہینگ سینگ انڈیکس میں 1.46 فیصد اضافہ ریکارڈ کیا گیا، جبکہ تھائی لینڈ کے سیٹ انڈیکس میں بھی ایک فیصد کا اضافہ دیکھا گیا۔