اسلام آباد( پاکستان خبر) سپریم کورٹ نے پی بی 9 کوہلو میں دوبارہ گنتی سے متعلق درخواست کی سماعت کرتے ہوئے مقدمہ تین رکنی بینچ کے سامنے مقرر کرنے کی ہدایت کردی۔جسٹس نعیم اختر افغان کی سربراہی میں دو رکنی بینچ نے کیس کی سماعت کی۔ درخواست گزار کے وکیل کامران مرتضیٰ نے عدالت کو بتایا کہ قواعد کے تحت تین رکنی بینچ انتخابی ٹریبونل کے فیصلوں کے خلاف اپیلیں سن سکتا ہے، تاہم سپریم کورٹ کے نئے قواعد میں انتخابی ٹریبونل کا ذکر نہیں کیا گیا۔جسٹس نعیم اختر افغان نے ریمارکس دیے کہ چار پولنگ اسٹیشنز پر ووٹنگ ہوئی اور اصل تنازع غیرحقیقی ٹرن آؤٹ کا ہے۔ عدالت اس معاملے پر پہلے بھی فیصلہ دے چکی ہے، جبکہ موجودہ کیس میں بھی ٹرن آؤٹ 80 فیصد سے زیادہ ہونے کا سوال موجود ہے۔عدالت نے مقدمے کی مزید سماعت ستمبر کے دوسرے ہفتے تک ملتوی کردی۔واضح رہے کہ پی بی 9 کوہلو سے مسلم لیگ ن کے نواب چنگیز مری کامیاب ہوئے تھے، جن کی کامیابی کو پیپلز پارٹی کے نصیب اللہ نے چیلنج کررکھا ہے۔
