کراچی(کامرس ڈیسک) آل پاکستان پیٹرول پمپ اونرز ایسوسی ایشن نے حکومت کی مجوزہ پیٹرولیم پرائس ڈی ریگولیشن پالیسی مسترد کرتے ہوئے اس پر نظرثانی کا مطالبہ کیا ہے۔ایسوسی ایشن کے چیئرمین نعمان علی بٹ کا کہنا ہے کہ حکومت اپنی مجوزہ پالیسی پر نظرثانی کرے اور مسائل کا بوجھ پیٹرول پمپ مالکان پر نہ ڈالا جائے۔انہوں نے کہا کہ آئل مارکیٹنگ کمپنیوں (او ایم سیز) کے ساتھ قیمتوں کے تعین سے قبل تمام اسٹیک ہولڈرز کو اعتماد میں لیا جائے تاکہ متفقہ اور قابلِ عمل پالیسی مرتب کی جا سکے۔نعمان علی بٹ کے مطابق ملک بھر کے تقریباً 15 ہزار پیٹرول پمپ مالکان مجوزہ پرائس ڈی ریگولیشن پالیسی پر شدید تحفظات رکھتے ہیں اور حکومت کو اس فیصلے سے قبل متعلقہ فریقوں سے مشاورت کرنی چاہیے۔
