وزیراعظم کی مون سون صورتحال سے نمٹنے کیلئے اقدامات تیز کرنے کی ہدایت

 اسلام آباد( پاکستان خبر)وزیراعظم شہباز شریف سے چیئرمین نیشنل ڈیزاسٹر مینجمنٹ اتھارٹی (این ڈی ایم اے) لیفٹیننٹ جنرل انعام حیدر ملک نے ملاقات کی۔وزیراعظم آفس کے مطابق ملاقات کے دوران وزیراعظم کو ملک میں مون سون بارشوں کے دوران ممکنہ ہنگامی صورتحال سے نمٹنے کے لیے کی جانے والی تیاریوں پر تفصیلی بریفنگ دی گئی۔وزیراعظم شہباز شریف نے ہدایت کی کہ مون سون بارشوں کے دوران صوبائی حکومتوں اور صوبائی ڈیزاسٹر مینجمنٹ اتھارٹیز کے ساتھ رابطوں کو مزید مؤثر بنایا جائے تاکہ کسی بھی ہنگامی صورتحال کا بروقت مقابلہ کیا جاسکے۔ملاقات میں وزیراعظم کو پیشگی اطلاع رسانی کے نظام کو مکمل فعال بنانے اور وزارت موسمیاتی تبدیلی کے ساتھ جاری تعاون کے حوالے سے پیش رفت سے بھی آگاہ کیا گیا۔