اسلام آباد( کامرس ڈیسک) ڈسکوز کی نجکاری کے عمل میں چین، قطر، سعودی عرب اور ترکی نے سرمایہ کاری میں دلچسپی کا اظہار کیا ہے۔حکومتی منصوبے کے مطابق یہ ممالک مقامی سرمایہ کاروں کے ساتھ شراکت داری میں بجلی کی تقسیم کار کمپنیوں کی خریداری کے لیے حصہ لے سکتے ہیں۔ حکومت نے فیسکو، گیپکو اور آئیسکو کے 51 سے 100 فیصد شیئرز فروخت کرنے کا فیصلہ کیا ہے۔سینیٹر افنان اللہ کی زیر صدارت قائمہ کمیٹی برائے نجکاری کے اجلاس میں نجکاری کمیشن کے حکام نے بریفنگ دی۔ اجلاس میں بتایا گیا کہ وفاقی کابینہ نے ان کمپنیوں کی نجکاری کے لیے ٹرانزیکشن اسٹرکچر کی منظوری دے دی ہے۔حکام کے مطابق مختلف ممالک میں سرمایہ کاروں کو راغب کرنے کے لیے روڈ شوز بھی منعقد کیے جائیں گے، تاہم ایک سرمایہ کار کو ایک سے زیادہ ڈسکوز خریدنے کی اجازت نہیں ہوگی۔نجکاری کمیشن کے مطابق فیسکو کے لیے اظہارِ دلچسپی کی آخری تاریخ 7 جولائی مقرر کی گئی ہے، جبکہ دیگر کمپنیوں کے لیے یہ عمل مرحلہ وار اگست اور ستمبر تک مکمل کیا جائے گا۔
