اسلام آباد( پاکستان خبر) وزیر اعلیٰ خیبرپختونخوا سہیل آفریدی، پاکستان تحریک انصاف (پی ٹی آئی) کے رہنما جنید اکبر اور عبدالغنی آفریدی کے خلاف اشتہاری قرار دینے کی کارروائی شروع کر دی گئی ہے۔پولیس کی جانب سے انسدادِ دہشت گردی عدالت اسلام آباد میں جمع کرائی گئی رپورٹ میں بتایا گیا ہے کہ مارگلہ تھانے میں 26 نومبر کے واقعات سے متعلق درج مقدمے میں پیش رفت رپورٹ عدالت میں جمع کرا دی گئی ہے۔رپورٹ کے مطابق ملزمان کے چالان جمع نہ کرانے سے متعلق عدالت کی جانب سے جاری نوٹس کا جواب بھی پیش کر دیا گیا ہے۔ پولیس نے بتایا کہ عدالت کے 23 جون 2026 کے حکم پر ملزمان کے ناقابلِ ضمانت وارنٹ گرفتاری حاصل کیے گئے تھے، تاہم کوششوں کے باوجود ان پر عملدرآمد نہیں ہو سکا۔پولیس رپورٹ میں کہا گیا ہے کہ وارنٹ گرفتاری کی تعمیل نہ ہونے کے باعث ملزمان کے خلاف قانون کے مطابق اشتہاری کارروائی شروع کر دی گئی ہے۔رپورٹ کے مطابق اشتہاری کارروائی مکمل ہونے کے بعد ضابطہ فوجداری کی دفعہ 173 کے تحت چالان کی تیاری آخری مراحل میں ہے، جبکہ چالان مکمل ہوتے ہی عدالت میں پیش کر دیا جائے گا۔ڈی آئی جی اسلام آباد کی رپورٹ میں مؤقف اختیار کیا گیا ہے کہ مقدمے کی کارروائی میں کسی بھی مرحلے پر غفلت، تاخیر یا کوششوں میں کمی نہیں کی گئی اور قانون کے مطابق تمام اقدامات کیے جا رہے ہیں۔
