ممبئی( شو بز ڈیسک) بالی ووڈ کے مزاحیہ اداکار راجپال یادیو نے اداکار مشتاق خان کے انتقال سے چند گھنٹے قبل ہونے والی آخری ملاقات کی تفصیلات بیان کردیں۔مشتاق خان گزشتہ روز 56 برس کی عمر میں پھیپھڑوں کے سرطان کے باعث انتقال کرگئے۔ ان کے انتقال پر بھارتی شوبز شخصیات کی جانب سے تعزیتی پیغامات کا سلسلہ جاری ہے۔راجپال یادیو نے بتایا کہ وہ اسی دوپہر مشتاق خان سے ملنے اسپتال گئے تھے۔ انہوں نے کہا کہ مشتاق خان نے انہیں دیکھا، ہاتھ ملایا اور گفتگو کے دوران ان کی باتوں کا جواب بھی دیتے رہے۔اداکار نے جذباتی انداز میں کہا کہ انہیں اب بھی یقین نہیں آرہا کہ جس شخص سے صرف دو گھنٹے قبل ملاقات اور ہاتھ ملایا تھا، وہ اب دنیا میں موجود نہیں۔راجپال یادیو نے اسپتال میں مشتاق خان سے ملاقات کی مختصر ویڈیو بھی شیئر کی تھی، جسے بعد میں تصویر سے تبدیل کردیا۔مشتاق خان نے 1980ء میں فلم ’البرٹ پنٹو کو غصہ کیوں آتا ہے؟‘ سے فنی سفر شروع کیا تھا اور تین دہائیوں سے زائد عرصے پر محیط کیریئر میں ’ویلکم‘، ’غدر: ایک پریم کتھا‘ اور ’استری 2‘ سمیت متعدد فلموں میں اداکاری کی۔
