اسلام آباد (پاکستان خبر) وزیراعظم کے مشیر برائے سیاسی امور رانا ثنا اللہ نے کہا ہے کہ جمعیت علمائے اسلام (ف) کے سربراہ مولانا فضل الرحمان نے حکومت سے کبھی گورنر شپ یا کسی دوسرے عہدے کا مطالبہ نہیں کیا۔اپنے بیان میں رانا ثنا اللہ کا کہنا تھا کہ خیبرپختونخوا میں دہشت گردی کے خلاف جنگ میں مولانا فضل الرحمان کا تعاون حاصل کرنا چاہیے۔ اگر مولانا فضل الرحمان کی وفاقی وزیر داخلہ محسن نقوی سے کوئی بات چیت ہوئی ہے تو اس بارے میں وہ کچھ نہیں کہہ سکتے۔انہوں نے کہا کہ مولانا فضل الرحمان نے ان سے کبھی گورنر شپ یا کسی اور معاملے میں کوئی تقاضا نہیں کیا۔ ان کے خیال میں جاری کیے گئے نوٹسز کے معاملات بھی حل ہو سکتے ہیں۔وزیراعظم کے مشیر نے تحریک انصاف کے رہنما سہیل آفریدی پر تنقید کرتے ہوئے کہا کہ وہ ان سے کہتے تھے کہ بانی پی ٹی آئی کی محبت میں جان دے دیں گے، لیکن دوسری جانب خود محسن نقوی سے ملاقاتیں کرتے تھے۔رانا ثنا اللہ کے مطابق بانی پی ٹی آئی سے ملاقاتوں پر پابندی کی وجہ ملاقاتوں کے دوران پیغامات پہنچانا اور سیاسی بیانیے بنانا تھا۔ انہیں بارہا کہا گیا کہ اس طرح کی مہم اور سوشل میڈیا پر تنقید سے گریز کریں، لیکن وہ باز نہیں آئے، جس کے بعد ملاقاتیں بند کرنا پڑیں۔