اسلام آباد( پاکستان خبر) وزیر خزانہ محمد اورنگزیب نے کہا ہے کہ پاکستان کو درپیش بڑے چیلنجز میں بڑھتی ہوئی آبادی بھی شامل ہے، جس سے نمٹنے کے لیے بروقت اور مؤثر اقدامات کرنا ضروری ہیں۔اسلام آباد میں عالمی یومِ آبادی کے موقع پر منعقدہ سیمینار سے خطاب کرتے ہوئے وزیر خزانہ نے کہا کہ نیشنل پاپولیشن کونسل کا قیام آبادی سے متعلق پالیسی سازی اور بہتر منصوبہ بندی کے لیے ایک اہم قدم ہے۔انہوں نے کہا کہ بڑھتی ہوئی آبادی اور موسمیاتی تبدیلی جیسے مسائل سے نمٹنے کے لیے جامع اور مربوط حکمت عملی اپنانا وقت کی اہم ضرورت ہے۔ آبادی میں اضافے کو متوازن رکھنے کے لیے مختلف اقدامات کی غرض سے فنڈز بھی مختص کیے گئے ہیں۔محمد اورنگزیب کا کہنا تھا کہ تیزی سے بڑھتی ہوئی آبادی کے باعث ملک کے دستیاب وسائل پر دباؤ مسلسل بڑھ رہا ہے، اس لیے مؤثر منصوبہ بندی اور عملی اقدامات ناگزیر ہیں۔
