اسلام آباد (کامرس ڈیسک) لائیوسٹاک کے شعبے میں اہم پیشرفت کے طور پر روسی فٹ اینڈ ماؤتھ ڈیزیز ویکسین کی فراہمی بحال کر دی گئی ہے۔اس پیش رفت میں خصوصی سرمایہ کاری سہولت کونسل نے کلیدی کردار ادا کیا، جس کے نتیجے میں لائیوسٹاک شعبے کی ترقی اور بین الاقوامی تعاون کو مزید تقویت ملی ہے۔پاکستان میں فٹ اینڈ ماؤتھ ڈیزیز کے باعث لاکھوں مویشی متاثر ہو رہے ہیں، جس سے مویشیوں کی پیداوار اور برآمدات کو شدید نقصان پہنچ رہا ہے۔ گزشتہ تین برسوں کے دوران اس بیماری کے تقریباً دو ہزار ایک سو کیسز رپورٹ ہوئے ہیں۔حکام کے مطابق خصوصی سرمایہ کاری سہولت کونسل کی معاونت سے روسی ویکسین کی فراہمی سے متعلق اہم مسئلہ کامیابی سے حل کر لیا گیا ہے۔ روس کے تجارتی نمائندے ڈینس اے نیو زوروف نے متعلقہ اداروں کے درمیان مؤثر رابطہ کاری پر اس کونسل کے کردار کو سراہا۔ماہرین کا کہنا ہے کہ اس اقدام سے مویشی پالنے والے کسانوں کے اعتماد میں اضافہ ہوگا اور بیماریوں سے بچاؤ کا نظام مزید مؤثر بنے گا۔ بہتر ویکسین کی دستیابی سے لائیوسٹاک کی پیداوار اور معیار میں بہتری کے ساتھ شعبے میں ترقی کے نئے مواقع پیدا ہوں گے۔اس پیش رفت سے پاکستان کے لائیوسٹاک شعبے کو فروغ، برآمدات میں اضافہ اور پاکستان و روس کے درمیان تعاون میں مزید استحکام کی توقع ظاہر کی جا رہی ہے۔
