صادق خان ہاؤس آف لارڈز کے رکن نامزد، برطانوی سیاست میں نیا اعزاز

لندن( مانیٹرنگ ڈیسک) برطانیہ کے وزیراعظم سر کیئر اسٹارمر نے ہاؤس آف لارڈز کے نئے ارکان کے ناموں کا اعلان کر دیا ہے، جن میں لندن کے سابق میئر صادق خان کا نام بھی شامل ہے۔برطانوی حکومت کے مطابق وزیراعظم کی سفارش پر بادشاہ چارلس سوم نے نئی نامزد شخصیات کو تاحیات رکنِ ایوانِ بالا (لائف پیر) بنانے کی منظوری دینے پر رضامندی ظاہر کر دی ہے۔اس فیصلے کے بعد صادق خان برطانوی پارلیمنٹ کے ایوانِ بالا ہاؤس آف لارڈز کے رکن بن جائیں گے، جہاں انہیں قانون سازی کے عمل، قومی پالیسیوں اور اہم عوامی معاملات پر ہونے والی بحث میں حصہ لینے کا حق حاصل ہوگا۔صادق خان لندن کے تین مرتبہ منتخب ہونے والے میئر رہ چکے ہیں اور برطانوی سیاست میں پاکستانی نژاد مسلم رہنما کے طور پر نمایاں مقام رکھتے ہیں۔ اس سے قبل انہیں برطانیہ کے اعلیٰ اعزاز نائٹ ہُڈ سے بھی نوازا جا چکا ہے۔ڈاؤننگ اسٹریٹ کے مطابق نئی نامزدگیوں کا مقصد مختلف شعبوں میں نمایاں خدمات انجام دینے والی شخصیات کو قومی سطح پر خراجِ تحسین پیش کرنا ہے۔ہاؤس آف لارڈز میں اس وقت تقریباً 774 ارکان شامل ہیں اور یہ برطانوی پارلیمنٹ کا ایک اہم حصہ ہے، جہاں قانون سازی کا جائزہ لینے کے ساتھ ساتھ قومی اور عوامی اہمیت کے معاملات پر تفصیلی بحث کی جاتی ہے۔سیاسی مبصرین کے مطابق صادق خان کی لارڈ شپ ان کے سیاسی سفر میں ایک اہم سنگِ میل ہے، جبکہ برطانیہ میں پاکستانی نژاد برادری کے لیے بھی اسے ایک نمایاں کامیابی قرار دیا جا رہا ہے۔