لاہور( شو بز ڈیسک)یوٹیوبر شاہ ویر جعفری نے نئے ڈرامے ’حرمت‘ کے ذریعے ٹیلی ویژن پر اداکاری کا آغاز کردیا، تاہم پہلی قسط نشر ہوتے ہی ان کی پرفارمنس پر سوشل میڈیا صارفین کے دلچسپ تبصرے سامنے آنے لگے۔شاہ ویر ڈرامے میں ایک امیر اور روایتی ’رچ برَیٹ‘ کا کردار ادا کررہے ہیں، جبکہ دنانیر مبین مرکزی کردار حرمت کے روپ میں نظر آرہی ہیں۔پہلی قسط کے بعد کئی صارفین نے شاہ ویر کی سنجیدہ اداکاری پر مزاحیہ تبصرے کیے۔ بعض ناظرین کا کہنا تھا کہ وہ انہیں اب بھی یوٹیوب پر اسکیٹس کرتے ہوئے دیکھ رہے ہیں، جبکہ کچھ صارفین نے لکھا کہ ڈرامہ دیکھتے ہوئے انہیں شاہ ویر کا مخصوص ہنسنے کا انداز یاد آتا رہا۔دوسری جانب دنانیر مبین کی اداکاری کو ناظرین کی جانب سے خاصی پذیرائی ملی۔ مداحوں نے ان کے تاثرات اور اداکاری کی تعریف کرتے ہوئے ان کی پرفارمنس کو سراہا۔
