کیلیفورنیا( ویب ڈیسک) مشہور ڈیزائنر نے ایک ایسی شرٹ تیار کی ہے جس کے بارے میں دعویٰ کیا گیا ہے کہ اسے پہننے والے افراد چہرہ شناخت کرنے والی مصنوعی ذہانت کی نظروں سے اوجھل ہوسکتے ہیں۔ڈیزائنر سائمن ویکرٹ نے یہ منفرد لباس دنیا بھر میں مصنوعی ذہانت سے لیس ویڈیو نگرانی کے بڑھتے ہوئے استعمال کے ردِعمل میں تیار کیا ہے۔’ڈیجیٹل کیموفلاج‘ نامی شرٹ کے مخصوص رنگ اور تجریدی نقش و نگار مصنوعی ذہانت پر مبنی اشیا کی شناخت کرنے والے نظاموں کو مبینہ طور پر الجھا دیتے ہیں، جس کے باعث یہ نظام شرٹ پہننے والے شخص کو انسان کے طور پر شناخت کرنے میں ناکام ہوسکتے ہیں۔سائمن ویکرٹ کے مطابق مصنوعی ذہانت کے نظاموں نے دراصل یہ نہیں سیکھا کہ انسان کیا ہوتا ہے، بلکہ لاکھوں تربیتی تصاویر کی مدد سے یہ سیکھا ہے کہ انسان عام طور پر شماریاتی اعتبار سے کیسا دکھائی دیتا ہے۔تاہم ڈیزائنر نے واضح کیا کہ ’ڈیجیٹل کیموفلاج‘ پولیس سے بچنے کا ذریعہ نہیں اور نہ ہی یہ مکمل گمنامی کی ضمانت فراہم کرتا ہے۔
