صومالیہ: اغوا شدہ آئل ٹینکر کے 10 پاکستانیوں سمیت عملہ 40 روز بعد بھی یرغمال

کراچی ، موغادیشو (پاکستان خبر) صومالی قزاقوں کے قبضے میں موجود آئل ٹینکر “آنر 25” کے اغوا کو 40 روز مکمل ہو گئے ہیں، تاہم 10 پاکستانیوں سمیت تمام یرغمالی اب تک رہا نہیں ہو سکے۔رپورٹ کے مطابق 21 اپریل کو صومالی قزاقوں نے آئل ٹینکر پر حملہ کر کے اسے اپنے قبضے میں لے لیا تھا اور عملے کے 17 افراد کو یرغمال بنا لیا گیا تھا۔ یرغمال بنائے جانے والوں میں 10 پاکستانی، 4 انڈونیشیائی، ایک بھارتی اور ایک میانمار کا شہری شامل ہے۔سفارتی ذرائع کے مطابق صومالی حکومت آئل ٹینکر کے مالک کے ذریعے قزاقوں سے مذاکرات کر رہی ہے، تاہم اب تک ان مذاکرات میں کوئی قابل ذکر پیش رفت سامنے نہیں آ سکی۔ذرائع کا کہنا ہے کہ قزاقوں نے ابتدا میں 10 لاکھ ڈالر اور بعد ازاں 40 لاکھ ڈالر تاوان کا مطالبہ کیا، لیکن بات چیت تاحال بے نتیجہ ہے۔مزید بتایا گیا ہے کہ آئل ٹینکر اس وقت صومالیہ کے ساحل کے قریب لنگر انداز ہے اور صورتحال بدستور کشیدہ ہے۔سفارتی ذرائع کے مطابق صومالی حکومت نے پاکستان کو یقین دہانی کرائی ہے کہ وہ یرغمال پاکستانیوں کی رہائی کے لیے مسلسل کوششیں کر رہی ہے، اور اس حوالے سے پاکستان کو باضابطہ طور پر آگاہ بھی کیا گیا ہے۔