لاہور( سپورٹس ڈیسک)جنوبی افریقا نے اہم فاسٹ بولرز کی عدم موجودگی کے باوجود پہلے ون ڈے میں آسٹریلیا کو 67 رنز سے شکست دے دی۔ڈربن میں جنوبی افریقا نے پہلے بیٹنگ کرتے ہوئے 8 وکٹوں پر 297 رنز بنائے۔ میتھیو بریٹزکے نے شاندار سنچری اسکور کی، جبکہ مارکو جینسن نے 75 رنز کی جارحانہ اننگز کھیلتے ہوئے ان کے ساتھ 107 رنز کی اہم شراکت قائم کی۔ بریٹزکے ابتدائی 14 ون ڈے اننگز میں سب سے زیادہ رنز بنانے والے بلے باز بھی بن گئے۔ہدف کے تعاقب میں آسٹریلیا نے مچل مارش اور ٹریوس ہیڈ کی جارحانہ بیٹنگ سے اچھا آغاز کیا اور ابتدائی 10 اوورز میں 90 رنز بنا لیے، تاہم کیشو مہاراج اور بیورن فورٹوئین کی اسپن بولنگ نے میچ کا رخ بدل دیا۔دونوں اسپنرز نے مجموعی طور پر 6 وکٹیں حاصل کیں، جبکہ جینسن اور دیگر جنوبی افریقی بولرز نے بھی اہم مواقع پر وکٹیں حاصل کیں۔ آسٹریلیا کی آخری 9 وکٹیں 101 رنز کے دوران گر گئیں اور پوری ٹیم 232 رنز پر آؤٹ ہوگئی۔
