حفاظتی اقدامات کے باوجود یوٹیوب پر بچوں کو نقصان دہ مواد کی سفارشات جاری، تحقیق

کیلیفورنیا( ویب ڈیسک)حالیہ تحقیق میں انکشاف ہوا ہے کہ حفاظتی اقدامات اور نئے ضابطوں کے نفاذ کے باوجود یوٹیوب بچوں کو کھانے کی خرابیوں سے متعلق نقصان دہ مواد تجویز کر رہا ہے۔سینٹر فار کاؤنٹرنگ ڈیجیٹل ہیٹ (سی سی ڈی ایچ) کی رپورٹ کے مطابق اگرچہ آن لائن حفاظتی قوانین کے بعد یوٹیوب کے نظام میں نمایاں بہتری آئی ہے، تاہم پلیٹ فارم اب بھی کم عمر صارفین کو غیر صحت مند ڈائٹنگ، غیر ضروری وزن کم کرنے اور کم غذائیت والی خوراک سے متعلق ویڈیوز تجویز کر رہا ہے۔تحقیق کے مطابق یہ سفارشات یوٹیوب کے "اپ نیکسٹ" الگورتھم کے ذریعے سامنے آئیں۔ اس مقصد کے لیے امریکا، برطانیہ اور یورپ میں 13 سالہ بچی کے فرضی اکاؤنٹس بنا کر یوٹیوب کے سفارشی نظام کا جائزہ لیا گیا۔رپورٹ میں بتایا گیا کہ 2024 کے مقابلے میں نقصان دہ مواد کی سفارشات میں نمایاں کمی آئی ہے اور اب ایسی سفارشات کی شرح ہر 9 سفارشات میں ایک رہ گئی ہے، تاہم محققین کے مطابق بچوں کے تحفظ کے لیے مزید مؤثر اقدامات کی ضرورت ہے۔یہ تحقیق برطانیہ کے آن لائن سیفٹی ایکٹ، یورپی یونین کے ڈیجیٹل سروسز ایکٹ اور یوٹیوب کی جانب سے متعارف کرائے گئے نئے حفاظتی اقدامات کے بعد ان کی مؤثریت کا جائزہ لینے کے لیے کی گئی۔